KORONADAL CITY- INILUNSAD sa isang pharmacy sa SM General Santos City ang pinakaunang Resbakuna sa Botika sa Soccaskargen region sa pangunguna ni Department of Health o DOH 12 Regional Director Aristides Concepcion Tan.
Ang pharmacy-based vaccination roll out ay bahagi ng mas pinaigting na kampanya laban sa COVID 19 at asahan umano ang pagbubukas ng mas maraming pang vaccination sites sa rehiyon na mas accessible sa publiko.
Inihayag ni Tan na ito ay malaking tulong upang mapalawak pa ang vaccination coverage lalo na sa mga unvaccinated at mga eligible na ng booster dose.
Ang Resbakuna sa Botika ay bukas sa mga may edad 18 hanggang 59 anyos, ngunit hindi sa mga senior citizens, persons with disabilities, at mga may co-morbidities.
Ang vaccination hours ay magsisimula alas 3 ng hapon hanggang alas-7 ng gabi.
