Natigayon nga maaresto paagi sa ginhiwat nga Manhunt Charlie Operation kang San Remigio Municipal Police Station sa pagpanguna ni PCpt. Paul Joseph Oberio, kaimaw kang Provincial Intelligence Unit Antique, kag Sibalom Municipal Police Station ang ginakabig nagapanguna nga Most Wanted Person sa rehiyonal, probinsyal kag banwa nga lebel bangud sa kaso Rape sa diin dya ang may darwa ka separado nga warrant of arrest.
Dya ang ginkilala kay alyas Dagul, 22 anyos, estudyante, kag residente kang Brgy. Sinundulan, San Remigio, Antique, ginabanta las-2:27 kang Agosto 31, 2024, sa District I, Sibalom, Antique.
Nangin madinarag-un ang pag-aresto sa persona paagi sa gahum kang warrant of arrest nga may criminal case no. 2024-08-11032 kag 2024-08-11033 sa diin pirmado ni Hon. Jojo Cruz Cruzat nga ginpetsahan Agosto 29, 2024 kag wara kang may ginarekomenda nga balor kang piyansa para sa anang temporaryo nga kahilwayan.
Kaimaw man kang mga kapulisan sa pagserbe kang mandamiento de arresto ang presensya kang Brigada News FM San Jose Antique.
Sa kadya, sa idalum ron kang kustodiya kang San Remigio MPS ang persona para sa nagakaigo nga tikang antes dya itugyan sa korte nga nagakaput kang anang kaso.
