Boluntaryo nga nagsurrender ro sambilog ka 29 anyos nga miyembro it New People’s Army (NPA) sa Hamtic, Antique.
Ro surrenderee nga ginkilaea eamang bilang “Ka Ondoy” hay sambilog ka vice squad leader it Team 2, Squad 2 it Front 11, Southern Front Committee (SFC), Komiteng Rehiyon Panay, (KR-P) nga nagahiwat it mga operasyon sa Miag-ao, Igbaras, San Joaquin, Iloilo, Sibalom, San Remigio ag Hamtic, Antique.
Nag-intra raya sa NPA ku Agosto 12, 2018.
Kalisod, gutom, ag kakulangan sa tueog ro pila ka mga rason kung haman nagdesisyon raya nga mag-surrender sa mga otoridad.
Base kay Ka Ondoy, nagkainteres imaw nga mag-intra sa rebelde nga grupo bangud sa pagkukmbinse ni alyas “Ka Lian.”Ginpromiso sa ana ro maeain-eain nga mga benepisyo.
Ku nagtaliwan nga buean, nagpaeagiw si Ka Ondoy ag ginbayaan ro anang baril sa andang temporaryo nga gina-ulian
Samtang, gindayaw man ni Police Brigadier General Rolando Miranda ro pulisya ag militar sa andang commitment sa kampanya kaangut sa pagpundo it mga local communist armed conflict./JIL B. LACSON
