GIPAILAWOM na sa state of calamity ang Purok Saeg, Barangay Calumpang, GenSan human nawad-an og balay ang 1,169 katao.
Dungan sa pag-ulbo sa sunog sa pasado alas-2 sa hapon nga miresulta sa pagkasunog sa gibana-banaang 100 kapin ka panimalay.
Matud ni Kapitan Ryan Dupalco, pinaagi sa resolusyon gideklara sa barangay council ang pagpailawom sa lugar sa state of calamity.
Dugang ni Dupalco, lakip sa nasunog ang mga balay nga naa sa Zone 1, 2 ug 3 sa nasangpit nga Purok.
Wala natala nga patay apan dunay tulo katao nga samaron ug ang danyos gibana-banaang naa sa P500, 000.
Kasamtangan, nagpahigayon og imbestigasyon ang Bureau of Fire Protection (BFP) sa GenSan.
Aron sayron asa nanukad ang sunog apan giangkon nga dunay mga impormasyong nadawat nakalabut sa posiblen giugatan sa sunog.
Sama na lang sa paghaling sa bata sulod sa usa ka panimalay sa lugar asa dunay stock nga krudo.
Giangkon ni Senior Fire Officer 3 (SFO3) Allan Rey Emperio, Chief Investigator sa BFP nga wala pa nila natumbok ang gigikanan sa sunog.
Sa ulahing datus sa City Social Welfare and Development Office (CSWDO) naa sa 470 ka household ang apektado sa sunog sa maong residential area. – Richel Gubalani
