GIKATAKDA nga magtagbo ang mga opisyal sa Public Transport Allaince of Gensan kon PTAG sa adlaw nga Sabado gumikan sa dakung usbaw sa presyo sa gasolina ug krudo sa milabay nga adlaw nga Martes.
Sa paghinabi sa 89.5 Brigada News FM Gensan sa pangulo sa PTAG nga si Robert Cang sumala niini nga apektado sila sa pag-usbaw sa presyo sa krudo ug gasolina bisan kon anaa na sila sa modern transportation.
Ang mga unit sa PTAG nga nagatubil og krudo ang ilang bus nga may aircon nga mokabat sa 31 ka unit ug ang nagatubil og gasolina ang 60 ka multicabs, samtang anaa lang sa 41 ang electric jeepneys.
Gidugang ni Cang nga sa presyo sa gasolina nga anaa sa P61-62 pesos daku kaayo ang epekto niini sa ilang pamasada, posible nga dili na mobyahe ang uban susama sa nahitabo sa pipila ka tuig na ang nakalabay.
Samot pa gayod daw karon nga adunay pandemya unya padayong limitado ang ginatugot nga pasahero, mao nga gitakda nila ang ilang panagtagbo sa umaabot nga adlaw nga Sabado aron mahisgotan ang ilang kahimtang sa kasamtangan nga sitwasyon.
Kahibaluan nga kaniadtong Martes, Oktubre 12 nisaka sa 1.30 matag litro ang krudo samtang 1.50 sa gasolina mao nga niabot na sa P62 pesos ang matag litro sa gasolina. ( Ver Diazon)
