BICOL – LIWAT na pigbisto an tibay asin urag kan Production Team kan DepEd TV Bicol matapos na makakua nin maabot sa doseng award sa ginibong 2021 DepEd TV Awards.
Sa ginibong announcement of winners, pignumbraran bilang Most Outstanding Teacher Broadcaster for MAPEH (junior high/senior high) an paratukdo na si Francisco Alamares o mas bistado bilang si “Teacher Kneeko” mantang an pigresibe kan DepEd Region V an award bilang Most Outstanding Regional Office for Deped TV.
Apwera digdi pigresibe man kan DepEd TV Bicol Production Team an mga award para sa Best Remote Team asin Gender Sensitivity Award.
Mantang nagkapira pa sa mga subject-based awards iyo an Most Outstanding School for DepEd TV na nakua kan Tabacco National High School; Most Outstanding Schools Division Office para sa Tabaco City Division asin Most Outstanding Local Government Unit for Deped TV na ipig award sa lokal na govierno kan ciudad.
Samantala, para sa Broadcast Design Awards, nakua kan mga miembro kan team na sinda Victor Angelo Roco asin Kim Mendivel an Best Original Score; Jason Borabo, Jeffrey Sape, Victor Angelo Roco asin Kim Mendivel an Best Cinematography; Best Original Music Video an ipigtao ki Hanna Monique Mendivel siring man Best Production Design asin Best Costume Design para sa bilog na Production Team kan DepEd TV Bicol.
Nagpahayag man nin pasasalamat an bilog na DepEd TV Bicol Production Team sa gabos na mga nagtabang tanganing makua kan saindang grupo an trayumpo asin sa gabos na nakatuwang sa pagbubusol kan saindang adbokasiya na “Para sa Bata, Bayan at sa buong Kaguruan ng Pilipinas.”
