“Dako ang balatakon sang probinsya kun ang pagpangbakuna batok sa Covid-19 ang pagahambalan”. Ini ang pahayag ni Provincial Health Officer Dr. Ernell Tumimbang sa liwat nga pagpatigayon sang National Vaccination Day 3 subong nga adlaw (Febrero 10) magatapos sa adlaw sang biyernes (Febrer0 11) kun sa diin ang pagpangbakuna ang gindungan sa pagpanagtag sang Kapitolyo Probinsyal sang ayuda sa mga pumuluyo nga naapektuhan sang bagyo sa banwa sang Cauayan.
Sandig kay Tumimbang yara pa lamang sa 57 porsyento sang mga Negrosanon ang ‘fully immunized’ apang ang mga pumuluyo nakabaton sang 1st dose ang yara sa 70 porsyento.
Nagalaom ang provincial health officer nga mangin mataas ang coverage sang duha ka adlaw nga NVDay 3 sa probinsya.
Wala labot sa lima ka mga lugar ginpatigayunan sang pagpanagtag sang ayuda sa banwa sang Cauayan, ang PHO ang nag-deploy man sang mga vaccinators sa syudad sang Bago, Kabankalan kag San Carlos.
Sang damlang lang ginpahayag ni Governor Eugenio Jose Lacson nga yara sa 80 porsyento ang lagson sang probinsya sa karon nga tuig 2022 agud maangkon ang “population protection” sadto ginatawag nga “herd immunity”.
Suno kay Dr. Tumimbang kun nga-a nagalambot sa 80 porsyento ukon 2 ka milyon ka mga pumuluyo ang kinahanglan mabakunahan batok sa Covid-19 agud nga maangkon ang “population protection”, ini ang base sa “projected population” para sa tuig 2022 nga gintalana sang Department of Health (DOH).
Dugang pa ni Tumimbang handa na ang “launching” sang pagpangbakuna para sa mga kabataan naga-edad sang 5 tubtub 11 anyos nga patigayunon sa Teresita Lopez Jalandoni Provincial Hospital sa syudad sang Silay sa palaabuton nga Febrero 14, 2022, lunes, Valentine’s Day.
