Nagdangat sa P15 milyunes nga balor sang ayuda ang ginpanghatag sang gobyerno probinsyal sang Negros Occidental para sa 3,979 ka mga pumuluyo sa 25 ka mga Barangay sa banwa sang Cauayan subong nga adlaw ( Febrero 10).
Ang “Rebuild and Restore Typhoon Odette Relief Operations” ginpangunahan ni Governor Eugenio Jose Lacson kag sa kinaandan ang mga “recipients” ang nakabaton sang food packs, balde, anum ka panid sang corrugated G.I. sheets kag ‘banana seedlings’.
Ang mga pumuluyo nakabaton sang bulig gikan sa probinsya ang gikan sa kabarangayan sang Magbugsay, Guiljungan, Camindangan, Molobolo, Sura, Talacdan, Tiling, Tomina, Tambad, Poblacion, Man-uling, Isio, Aabaca, Lumbia, Tuyom, Masaling, Caliling, Linaon, Basak, Yaoyao, Camalanda-an, Inayawan, Bulata, Elihan kag Baclao.
Sa iya nga bahin, ginpahayag ni Gov. Lacson ang nasambit nga pagpanagtag sang ayuda ang “continuation” sa ginsuguran sang probinsya sa syudad sang Sipalay, banwa sang Hinobaan kag Ilog.
Ang masunod nga banwa kadtu-an sang Gobernador para sa ‘relief operations’ amo ang banwa sang Candoni.
Samtang sa iya nga bahin, ginpahayag ni Cauayan Mayor John Rey Tabujara ang banwa ang nag-alokar sang pundo para sa kaugalingon sini nga relief operations para sa pumuluyo naapektuhan sang bagyo. Suno sa iya ang banwa ang nakabaton sang P57 milyunes nga pundo halin sa gobyerno nasyonal kag gindugangan ini sang pundo sang banwa nga P7 ka milyon sa diin gingamit agud ibulig sa iya sini mga pumuluyo.
Ang nasambit nga P64 milyunes pesos nga pundo ang gingamit bilang financial assistance para sa mga typhoon victims kun sa diin ang tags aka individual makabaton sang Isa ka libo ka pesos samtang ang pamilya nga may miyembro nagalambot sa lima ukon masubra pa diri ang magabaton sang P5 ka libo ka pesos.
