Tutulungan ng Police Regional Office ang mga nabiktima ng isang sindikato sa Central Luzon na ang modus ay hindi magbayad ng milyon-milyong halaga ng mga inorder na produkto.
Ito ay para masampahan ng kaso at maikulong ang mga miyembro ng grupo na ang target ay manloko ng mga negosyante ng bigas, telebisyon, aircondition units, mga pagkain at maraming iba pa.
Matatandaan, mula noong September 22 hanggang October 3 ay umabot sa mahigit tatlumpong mga negosyante ang naloko ng isang nagpakilalang pamilya na pansamantalang nanirahan sa isang subdibisyon sa bayan ng Subic.
Ayon kay PRO3 Dir. Pbgen. Valeriano De Leon, kakausapin ng personal ang ilan sa mga nabiktima para makuhanan ng mga ebidensya at mahikayat na magsampa ng kaso na magiging daan para maaresto ang mga suspek.//Christian Andres-BNFM OLONGAPO
