Indi magnaba sa lima ka mga “high-profile” murder cases sa Western Visayas ro padayon gihapon nga gina- imbestigahan it mga kapulisan ag mga otoridad.
Base sa direktor it Police Regional Office 6 (PRO-6) nga si Police Brigadier General Flynn Dongbo, mas pabaskugon pa ro imbestigasyon sa mga nakapending nga mga kaso.
Dugang pa nana, magahiwat it pagpueong sa tanan nga mga city ag provincial police director para pagasabton ro presente nga progreso it kada kaso kaangut sa mga imbestigasyon.
Sa rekord it PRO 6, ro mga uwa pa nahusgahan nga mga kaso sa idaeom ni dating PRO-6 director Police Brigadier General Rolando Miranda hay ro mga masunod:
*Pagpatay kay Cui
Ku Abril 12, si Mariano Antonio “Marton” Cui III, nga naging consultant it kapitolyo it Negros Occidental para sa mga operasyon it ospital, hay ginpatay samtang paguwa sa anang opisina sa Barangay Palampas, San Carlos City.
*Mga serye it pagpatay sa Bacolod
Ku Agosto 31, ginbaril, gibuno, ag ginpugutan it ueo ro drug suspect nga si Glenn Paul Castillo it Barangay Cabug sa Rosario Street, Barangay 38.
Ku Setyembre 20, sambilog ka nakaposas nga ginkilaea nga si Mark Anthony Cubos it Aguinaldo Street ro nakit-an nga may 26 nga tama it bala sa Barangay Banago.
*Pagpatay sa Antique treasurer
Ku Oktubre 14, sambilog ka barangay treasurer sa San Jose, Antique ro ginpatay it daywa ka uwa pa nakilaea nga armadong eaeaki.
*Pagpatay sa negosyante it Iloilo
Ku Oktubre 9, sambilog ka kontrobersyal nga negosyante nga dati eun nagapangatubang sa sunud-sunod nga criminal cases ro ginbaril ag ginbuno hasta mamatay it riding-in-tandem gunmen sa kahabaan it Fort San Pedro Drive, Barangay Veterans, Iloilo City.
*Kaso ni Claire Diergos
Nakit-an nga patay ro negosyante nga si Claire Diergos sa sueod it anang Montero Sports sa Barangay Inangayan, Santa Barbara, Iloilo ku Oktubre 26./JIL B. LACSON
