ANG pagtaas sa presyo sa buhing baboy ang hinungdan sa pagtaas usab sa presyo sa karne sa baboy sa central public market sa GenSan.
Kini ang giklaro ni Toto Mosqueda, Presidente sa Meat Vendors Multi Purpose Cooperative sa GenSan nga walay laing mabasol matud pa sa
pagsaka sa presyo sa karneng baboy nga karon halos mipantay na sa presyo sa karneng baka kondili ang presyo sa buhing baboy.
Itandi niadtong Desyembre nga kusog ang demand sa karneng baboy, anaa sa P170 to 175 ang presyo sa kada kilo sa buhing baboy apan karong Enero, anaa sa P200 to P210 per kilo.
Sa karon sa public market, ang pork belly anaa sa P360, ang laman, pork chop, casim anaa sa P340 per kilo, ang pata, ribs, tiil ug maskara sa tag P300 ang kilo kun pagtaas sa P20 hangtud P30 sa kada kilo itandi niadtong Desyembre.
Dugang ni Mosqueda nga dili usab sila mahimong magpabilin lang sa kanhing presyo tungod malugi sila ug dili na unya makapadayun sa pagbaligya.
