GIPANGHINAUT karon ni Dr. Fidel Peñamante, presidente sa Philippine Medical Association kun PMA-GenSan nga masulbad na ang problema sa PhilHealth aron masustiniran ang health system sa nasud.
Aminado usab si Peñamante nga maapektuhan gayud ang health system kung madayun ang disengagement sa mga private hospital association ngadto sa PhilHealth.
Sa karon, ginasulbad usab ang problema sa circular sa temporary suspension sa payment sa COVID-19 claims sa Philhealth sugod niadtong Agosto 13 tungod sa mga fraudulent claims nga gialegar.
Nabalaka si Peñamante nga sa maong circular lakip apektado ang mga miyembro sa Philhealth tungod maglisod na sila sa pagpaospital.
Samtang dugang niini kung dili makasingil sa ilang claims ang mga
pribadong ospital o bisan public hospital sa PhilHealth labi na sa COVID-19 claims, siguradong makaapekto kini og dako sa delivery sa health services labi pa sa mga anaa sa frontlines nga mga doktor ug nurses nga maglisod na makakuha sa ilang igong benepisyo.
Nanghinaut na lamang si Peñamante nga mahatagan og kasulbaran ang tanang problema sa PhilHealth aron dili usab magsakripisyo ang katawhan labi na karong pandemya.
