MIAPELA ang pipila ka doktor ug nurses sa GenSan sa nasudnong gobyerno nga ihatag na ang natanggong nga saad nga benepisyo sama sa hazard pay ug special risk allowances.
Matud ni Dr. Rochelle Oco, labaw sa City Health Office (CHO) ug incident commander sa local- Inter Agency Task Force on Covid-19. Dili makiangayon ang pagkadelatar sa benepisyo sa health workers luyo sa padayon nilang pag-atubang sa problema nga dala sa pandemya.
Giklaro ni Oco nga gisumpaan nila ang paghatag og serbisyo sa publiko partikular na sa problema sa panglawas. Apan kinahanglang ihatag usab sa gobyerno ang benepisyo nila sama sa Personal Protective Equipments (PPE’s).
Nanghinaot ang nasangpit nga dunggon sa gobyerno ang panawagan sa mga medical personnel kalabut sa kompensasyon. Sa karon, nasinatian sa GenSan ang ikaduhang ‘surger’ sa Covid-19 asa nahutdan na og nurses ang lima ka dagkong ospital sa dakbayan. Gikulang na usab og treatment ug isolation facilities og uban pang gamit alang sa mga Covid-19 patient tungod sa padayong pagsaka sa kaso sa virus sa dakbayan.
Photo: CTTO
