UBAY-UBAY na ang mga katawhan nga nagagawas sa panimalay ug naga-adto sa mga beach resorts sa syudad aron nga makaligo atol sa ikaduhang adlaw nga wala na ang Sunday lockdown.
Sa pagtuyok sa Brigada Oktubre 24 sa buntag sa mga beach resorts sa Bawing sirado gihapon ang London Beach, asa gwardiya, landscaper ug maintenance employee lang ang nabilin ug wala na ang ubang trabahante sa pipila ka bulan nga pagsirado tungod sa pandemya.
Sa Barangay Tambler, sarado usab ang Dolores Tropicana Beach Resort Extension ug ang main resort samtang abli na ang katapad nga Fanta Sea. Sumala kay Orlando Layamon, ang entrance incharge aduna nay nagsulod sa ilang beach apan ilang ginalimitahan sa edad 16-anyos, bawal ang ubos sa 16-anyos.
Samtang ang Maharlika Beach Resort abli na ug ang karatola bawal ang 15- anyos paubos, samtang adunay mga pribadong luna daplin sa baybay nga adunay naligo ug adunay mga sakyanan nga gibilin sa national highway.
Usa sa mga tricycle gawas sa Maharlika gikan sa Apopong ang wala nakasulod kay adunay kargang mga bata, sumala kay Arvin Domaniel wala sila gitugtan sa gwardiya nga makasulod kay aduna siya sakay nga tulo ka bata mao nga naghulat nalang sila sa gawas sa entrance sa ilang kaubanan nga naligo.
Nasabtan usab daw niini ang sitwasyon nga gibawalan ang mga bata sa pagsulod sa beach resort, aduna pay laing sakyanan nga aduna usab sakay nga bata ang wala gihapon nakasulod. ( Ver Diazon)
