Muling isinusulong sa Senado ang panukalang universal pension for senior citizens, matapos na bigong maipursege sa House of Representatives.
Sa pagdinig ng Senate Committee on Social Justice, Welfare and Rural Development, idinahilan ni Senior Citizens Party-list Rep. Rodolfo Ordanes ang kakulangan ng pondo, kung kaya’t ipinasa lang ng Kamara ang pagpapataas ng monthly social pension mula P500 sa P1,000, para lang sa mga indigent elderlies.
Ayon naman sa grupong Aksyon sa Pensyon (AKAP) Coalition, hindi umano ito sapat, lalo’t may utang pa ang gobyerno sa mga seniors, dahil sa lapses ng pagpapatupad sa Expanded Senior Citizens Act.
Dagdag ni Floro Francisco, kinatawan ng AKAP Coalition, ang kailangan nila kung maaari ay P1,500, bagama’t batid naman umano ng lahat na hindi ito sapat para sa pangangailangan ng senior citizens.
Senegundahan naman ito ng National Anti-Poverty Commission’s Senior Citizen Sectoral Council, at sa kanilang pagtaya, dapat ay P180 billion ang ilaan taon-taon, para sa P1,500 monthly pension para sa 10 million senior citizens. //MHEL PACIA-TRINIDAD
