LEGAZPI CITY – Hagad kan Philippine Drug Enforcement Agency (PDEA) Albay sa lokal na gobyerno kan Legazpi City na magpasar ini ki resolusyon may kinaraman sa mandatory witnessing kan mga opisyales de barangay sa mga drug buy-bust operation.
Sa intrevista kan Brigada News FM Legazpi kay PDEA Albay head Noe Briguel, sinabi niya na ini an pig-propose ninda sa Liga ng mga Barangay, kun sain kapag makondusir sinda nin operasyon, makua sinda ki witness sa adjacent barangay.
Segun kay Briguel, ini an nahihiling nindang paagi nganing mahali na an takot kan ibang mga opisyal na tibaad dai sinda botohan kan mga residente o kaya balikan sinda.
Nagtutubod man siya na magigin fair kun makua sinda ki witness sa kataid na barangay bako sana sa lado kan PDEA kundi pati man sa akusado.
Tubod man si Briguel na kun sa adjacent barangay sinda makua ki witness na elehidong opisyal, mababawasan an posibilidad nin pag-leak nin impormasyon mapadapit sa operasyon.
Mientrastanto, naglalaom si Briguel na maipapasar an nasambit na resolusyon.
