LEGAZPI CITY – Gadan an sarong paratinda nin balot sa syudad ni Legazpi matapos ining ma-hit and run alas nwebe kasubanggi sa Airport Road, corner F. Aquende Drive, Brgy. Cruzada kan nasambit na syudad.
Residente kan Brgy. Estanza kan naunambitang syudad an biktima, mantang residente kan Brgy. Sagpon, Daraga an naka-hit and run.
Nagluluwas sa inisyal na imbestigasyon kan Legazpi CPS na haleng Lakandula Drive an driver pasiring sa Airport Road kan tuminama ini sa shoulder road asin natamaan an metal traffic signage.
Sabay niyang naararo an biktima na nakatukaw mantang nagtitinda kan saiyang mga tindang balot sa nasambit na lugar.
Huli sa impact sa biktima, nagsapar ini ki mga tama sa payo na saiyang tulos na ikinagadan.
Dai man nagpundo an nakabangga asin durudiretso sa pag-drive kan saiyang behikulo alagad igwang buminukod digdi kaya nai-surrender ini sa mga otoridad.
An behikulo, igwa man nin nakuang danyos na dai pa makalkulo an kantidad asin kapot na ini kan mga otoridad kaiba an driver para sa magkakanigong disposisyon.
