LEGAZPI CITY – Nagpaparahay pa sa ospital an sarong paraoma makalihis ining tigbason kan saiyang amigo asin kainuman sa Purok 3, Sitio Melidong, Brgy. San Isidro sa banwaan nin Jovellar, Albay.
Binisto an biktima na si alyas “Juan”, 40 anyos mantang binisto man an suspetsado na si alyas “Pedro”, 36 anyos asin parehong residente kan nasambit na barangay.
Segun kay PCpl. June Cayaban, Police Investigator kan Jovellar MPS, nagluluwas sa saindang imbestigasyon na antes an paninigbas, nasa kasiraman irinuman ki arak an biktima asin suspetsado asin nagkainitan.
Huli kaini, nagkaigwa nin kariribokan, kuminua ki sundang an suspetsado asin pinagtitigbas an biktima sa manlaen-laen na parte kan lawas matang natusok man an suspek makalihis magbalos an biktima.
Tulos man nagresponder an pulisya sa lugar makalihis na makaresibe nin apod hale sa sarong concerned citizen.
Naabotan kan mga otoridad an suspetsado sa naumbitan na lugar na nagresulta sa pagkaarestar saiya mantang an biktima tulos man dinara sa BRTTH para sa atensyon medikal.
Sa ngunyan, pinaghahalat na sana kan pulisya an desisyon kun masangat an pamilya kan biktima nin kaso kontra sa suspetsado.
