Pumalag si Public Attorney’s Office chief Persida Acosta sa pagbansag sa kanya bilang ‘anti-vaxxer’.
Ito ay matapos aminin ni Acosta na hindi pa siya nababakunahan kontra COVID-19.
Paliwanag ng PAO chief walang katotohanan na hindi siya naniniwala sa bisa ng bakuna dahil sa katunayan kumpleto umano siya ng anti-cancer vaccines.
Maliban dito binigyan diin ni Acosta na halos lahat ng mga miyembro ng kanyang pamilya, pati ang kanyang panganay na anak ay fully vaccinated na laban sa COVID-19.
Ipinaliwanag naman ni Acosta na kaya hindi pa siya nagpapaturok laban sa COVID ay dahil hinihintay pa niya ang pagdating ng protein-based vaccine batay na rin sa payo ng kanyang doktor.
