Ang giingong pagpanawod ug tubig sa Barangay Basdiot sa lungsod sa Moalboal, misangko sa panaglalis sa duha ka mga lalaki nga miresulta pa sa pagpanunggab kagahapon sa alas 5 sa hapon, Mayo 14, 2024.
Ang biktima, giila nga si Paul Anthony Cabaron Junas, 30 anyos, adunay live-in partner ug residente sa nahisgutang dapit.
Samtang ang suspek mao si Junrey Gabales, residente sa Barangay Tomonoy sa maong lungsod.
Giingong nagkasingitay ang duha sa paglinya sa pagsawod og tubig nga misangko sa init nga panaglalis ug pagsinukmagay tali nila ni Junas ug Gabales.
Nabantayan na lang sa biktima nga gidungagb siya sa suspek gamit ang gunting.
Human sa insidente, daling mi-ikyas ang suspek apan, mi-surrender hinuon kini sa Moalboal Police Station alas 9:36 kagabie.
Samtang ang biktima, gidala sa Badian District Hospital alang sa dinalian nga medical attention ug gibalhin kini sa Vicente Sotto Memorial Medical Center.//