KABANKALAN CITY, Negros Occidental — Naga-balakhuon samtang naga-singgitan sang hustisya ang pamilya sang lalaki nga gin hit-and-run sang isa ka Canter sa National Highway sang Barangay Aguisan, syudad sang Himamaylan, pasado las-5 sang Sabado, Mayo 17.
Ang napatay ang gin-kilala kay Jonathan Macayaran, 48-anyos, may lima ka kabataan, kag residente sang Barangay Talaban, sa nasambitan nga syudad.
Sa interview sang Brigada News FM-Kabankalan kay Shyne Macayaran, kamagulangan nga bata ni Jonathan, naga-ubra ang iya amay bilang isa ka driver sang frozen food sa syudad sang Bacolod kag nagapuli ini kada semana sa iya puluy-an, gamit ang iya Honda TMX nga motor.
“Maghalong ka gid sa imo ubra,” amo ini ang madumduman nga tinaga nga gin-hambal sang amay ni Shyne sa iya samtang naga-ubra ini sa Manila, binulan antis napatay si Jonathan.
“Mapinalanggaon na si papa sa amon, kung ano kinanglan namon, ara na siya sa amon. Iban nga amay, matiis ang bata nila, pero ang amon, indi niya gid kami matiis,” pahayag ni Shyne.
Suno kay Shyne, dapat mag-sungka na kag atubangon sang driver sang Canter ang iya “wala kaluoy nga gin-ubra sa amon amay – matapos gin bunggo-an kag gin-lapak, antis nag sarorot palagyo.”*