Ginpahayag ni Lydia, 57 anyos, it Barangay Langka, San Joaquin, Iloilo, nanay it 20-anyos nga si Juveniel Sandig alyas Francis, nga naduea ro anang unga umpisa pa kat Disyembre 2017 kat imaw hay 17 dag-on pa eamang.
Base sa ana, uwa gid imaw nakasayod nga nag-intra ro anang unga sa NPA. Abi segun nanda nga bangud sa trabaho ro rason haman bigla eang nga naduea raya hasta nabalitaan eun eang nanda nga sambilog ro anang unga sa napatay sa engkwentro sa Alimodias, Miag-ao.
Naging emosyonal man si Paneng, 32 anyos, manghod ni Sandig nga namatay man sa pag-atake it militar. Base pa kana hay kunta mamatay eun ro tawo nga nag-rectruit sa anang manghod para uwa eun it madamay ag ma-recruit pa nga mga kabataan it rebeldeng grupo.
Sa pihak nga bahin, ginakasubo man ni Nanay Iki, 63 anyos, nanay ni Roger Pedro alyas Lim/Gurang it Barangay Osorio, San Remigio, Antique, ro pagkamatay it anang 39-anyos nga unga.
Base kay nanay, pagkatapos it 17 dag-on, nakita man nana ro anang unga pero bangkay eun galing raya.
Base pa sa anang pahayag, may mga suldado bga nagahambae nga ro anang unga hay sambilog sa mga lider it NPA pero uwa raya nagapati.
Dugang pa ni Nanay Iki, kung nakauli ro eang ro anang unga, imaw mismo ro maghambae nga mag-surrender raya sa mga otoridad.
Ginabasoe man nana ro nag-recruit sa anang unga.
Samtang nakipag-uangut man ro 301st Brigade commander nga si Brigadier General Marion Sison sa mga local government units para mabuligan ro mga pamilya it mga napatay nga rebelde nga magkaroon it disente nga eubong./JIL B. LACSON
