Kinumpirma ng Palasyo na aabot sa 150,000 metric tons ng asukal ang isinusulong ngayon na angkatin ng bansa.
Sa kanyang press briefing, sinabi ni Press Secretary Atty. Trixie Cruz-Angeles na ito ang napag-usapan sa nangyaring pulong sa pagitan nila Pangulong Ferdinand “Bongbong” Marcos Jr. kasama si Senate President Juan Miguel Zubiri at ang iba’t-ibang sugar stakeholders.
Ayon kay Angeles, umabot sa 150,000 metriko tonelada ang napag-usapang aangkatin ng bansa dahil may mga pangangailangan din daw ang nasa industrials.
Sa kabila nito, hindi pa naman matiyak ni Angeles kung kailan gagawin at kung saan balak mag-angkat ng Pilipinas ng asukal.
Mababatid na unang isinulong ng Department of Agriculture ang importasyon ng 300,000 metric tons ng asukal ngunit hindi naman ito pinaburan ni Pangulong Marcos.
#
