MAAYO ug makatabang sa mga kababainhan ang gipirmahan ni Pangulong Rodrigo Duterte nga balaod nga nagpataas sa edad sa sexual consent gikan sa 12 ngadto sa 16 anyos kung asa makonsidera na kining Rape, kini ang gibutyag ni Judith Janiola labaw sa City Population Management Office (CPMO) sa Gensan.
Ang balaod nagpasabot nga ang pakighilawas sa usa ka menor de edad ubos sa 16 anyos makonsidera na nga rape bisan kung ang menor de edad miuyon sa paghimo sa sekswal nga buhat. Sumala ni Janiola dako kini nga tabang aron masayran sa mga kalalakihan nga dili nila puwede hilabtan ang usa ka batan-ong babaye bisan paman kung sila adunay relasyon.
Isa kini nga gipasalamatan ni Janiola sa paglingkod sa Pangulo nga adunay balaod nga magtabang sa mga menor-de-edad nga sagad naabuso. Kinahanglan usab nga makonsidera dinhi kadtong mga nag-abuso sa ilang isigkatawo.
Panawagan niini sa publiko nga ipatala dayon ang unsa man nga pagpang-abuso nga mamatikdan sa palibot lakip sulod sa panimalay aron mahatagan og pagtagad ang tanan ug aron mapakgang ang kinsa man nga maghimo sa malaw-ay nga buluhaton. I Enamie Mogpon
