LEGAZPI CITY – Pig-aadalan na ngunyan kan gobyerno probinsyal kan Albay an pagpapautob nin mga localized action sa mga lokal na gobyerno nin huli sa padagos na namamateang pag-uuran dara kan southwest monsoon o habagat na mas pinakusog kan uminaging Super Typhoon Carina.
Segun kay Albay Public Safety and Emergency Management Office OIC John Eugene Vincent Escobar, sa presente, padagos an maigot na monitoring kan saindang opisina sa mga coastal barangays nin huli sa nairerehistrong haralangkaw na hukol dara kan maghapong pag-uuran sa nagkapirang parte kan probinsya.
Sinabi pa ni Escobar, apwera sa maigot na monitoring, nakikipagkoordinar naman su boot sinda sa mga lokal na gobyerno sa pagpapaluwas nin mga abiso. Dagdag pa kan opisyal, sa ngunyan, dai pa masasabi an pagsuspendir sa mga klase asin sa mga trabaho o opisina huli ta localized pa man sana an nairerehistrong epekto kan habagat.
Sa presente, padagos an pagtatao nin abiso asin pagirumdom kan APSEMO sa publiko orog na sa mga lugar sa west coast sa huma kan darakulang hukol, rain showers asin thunderstorms.
