PADAYON pa karon nga giimbestigahan sa Police Station 4 ang nahitabong pagpamusil sa wala pa mailhing suspek sa usa ka ginang nga giila nga si Marylou Zamora Bañes, 57-anyos, residente sa Delfin Compound, Corner Yumang Street, Barangay San Isidro, Gensan.
Kahibaloang alas 8:40 ang takna kagabie gipusil ang biktima samtang sakay sa usa ka tricycle, gitiro matud pa makapila ka higayon ang biktima ug nakaangkon og samad pinusilan sa iyang tiyan.
Sa inisyal nilang imbestigasyon nasuta nga pauli na unta ang biktima sa ilang panimalay sakay sa tricycle apan wala pa nakaabot sa ilang balay ang nasampit, kalit lang mi-overtake sa tricycle ang suspek nga nakamotorsiklo dayon gipusil ang biktima pila ka higayon.
Human sa pagpamusil, paspas nga misibat ang suspek padulong sa wala masayring lugar, samtang ang biktima, gidala dayon sa iyang mga kabanay sa ospital. Sa karon, ginasuta pa sa kapulisan kung unsay motibo ug kung si kinsa ang responsible sa maong pagpamusil. I MJ Fernandez
