TAKDANG ipailawom sa rehabilitasyon ug ekspansyon ang Fishport Complex sa Barangay Tambler, GenSan.
Kini ang gibutyag ni Paris Ayon, bag-ong labaw sa General Santos City Fish Port Complex (GSFPC) atol sa pag-atubang niini sa konseho Martes sa buntag.
Human giaprubahan sa National Economic and Development Authority (Neda) ang P2.84 bilyon kantidad sa proyekto. Matud ni Ayon, abli na kini karon alang sa bidding ug aron usab masudan na ang konstruksyon sa pasilidad.
Tumong niini ang matubag ang pipila sa problema sa fishing sector ug masiguro ang food security. Ang GenSan fishport complex ang usa labing dako nga fish ports sa nasud, nagsugod ang operasyon niini atong 1999 ug kini ang nahimong major fish landing ug trading hub sa southern ug central Mindanao.
2017, mipailawom usab sa pag-upgrade ug major expansion ang pipila ka bahin sa fishport complex sa GenSan ug gihimong moderno. I Richel Gubalani
