-Reymund Titong
KABANKALAN CITY, Negros Occidental — Natapos na ang pagpalapad ukon ‘widening’ sang 2.5-kilometer Kabankalan-Bais road sa Barangay Tagukon nga naga balor sang P39.4 million.
Sa report nga nakuwa sang Brigada News FM-Kabankalan, suno kay Department of Pubic Works and Highways (DPWH) Region 6 Director Sanny Boy Oropel, ang nasambit nga road project amo ang naga-kumpleto ang bilog nga malapad nga dalanon gikan sa syudad sang Kabankalan padulong sa banwa sang Mabinay, sa Negros Oriental.
Dugang pa ni Oropel, ang malapad nga dalan ang maka-akomodar sang madamo nga salakyan nga nagapasulod kag guwa sa probinsya sang Negros Occidental, malayo sa traffic, kag matawhay nga dalanon.
Ang proyekto ang gina-expektar man nga mapa-hapos ang delivery sang mga serbisyo sa mga nabukid nga bahin sang probinsya, kag makahatag man dugang nga oportunidad sa duwa ka probinsya sa isla sang Negros, sa patag sang negosyo.
Sa piyak nga bahin, nagpangabay man ang iban nga mga pumuluyo sa lugar nga kuntani mabutangan man sang streetlights ang dalanon, agud mas klaro sa mga motorista ang dalan sa tion sang kagab-ihon kag mabuhinan man ang numero sang gaka-aksidente.*
