Gimando na sa Department of Public Works and Highways (DPWH-XI) ang imbistigasyon nunto sa nahitabong pagkahugmak sa Ebrio Bridge sa Power Highway sa Tres de Mayo, Digos City, Davao del Sur niadtong Sabado (September 4, 2021) nga miresulta sapagkamatay sa usa ka trabahante ug pagkaakol sa usa pa.
Sumala kang DPWH-XI Spokesperson Dean Ortiz, laraw sa himoong imbistigasyon nga sutaon kung dunay tulubagon ang contractor nga nag-atiman sa maong tulay alang sa gikatakdang pagpahigayon sa demolisyon niini karong semahana.
Niadtong sabado usab gisugdan sa mga tarabahante sa kontraktor ang pagtanggal sa mga seed file lawom sa tulay apan nahitabo ang wala damha nga aksidente.
Una niini, nakabsan sa kinabuhi human nahugmakan sa tulay ang biktima nga giilang si Joyco Failma, 30-anyos, taga Upper Panuntungan, Tibungco, Davao City samtang samaran ang usa ka Dexter Orapa, 37-anyos taga Santo Rosario, Digos City nga padayong gitambalan sa ospital.
Ang kumpanya sa gitrabahuan sa biktima misaad nga mohatag og assistance sa pamilya niini lakip na sa pagpalubong.BNFM-DAVAO
