Natigayon nga mataban ang P900, 000 matapos ang nagluntad nga pagpang hold-up kang apat ka mga suspetsado sa sangka wing van sa Brgy. Rombang, Sibalom, las-5:00 sa hapon, kang tinalikdan nga Hulyo 18.
Ginkilala ang mga biktima kanday Allan Atadero, 43 anyos, driver kang van kag residente kang Brgy. Giumomoa, Passi City, Iloilo kag ang mga pahenante nga sanday Fernando Alvior, 23-anyos, residente kang Brgy. Purok 1, San Joaquin, Iloilo; kag Jome Alben Ramos, 29-anyos, pumuluyo naman kang Brgy. Turo-turog, Oton, Iloilo.
Sa pagpakig-angut kang Brigada News FM kay Deputy COP PCapt. Ephrime Udani IV, samtang nagabyahe pa Sur nga bahin kang probinsya ang 10-wheeler wing van kang mga biktima pauli kun daad sa syudad kang Iloilo, kang nagpundo dya sa bahin kang Rombang, Sibalom agud magpahingi si Gabriel Tubianosa,37-anyos residente kang Brgy.Bugo San Remigio nga pahenante man kang amo nga truck apang natukiban ka-kuntsaba kang mga suspetsado.
Sa wara kang ano man, natingala ang mga biktima nga may gulpi lang nagtuhaw nga darwa ka mga persona nga naka-helmet kag naka-kapote sakay sa motorsiklo, nagpaguwa kang badil kag nagdeklarar kang hold-up. Gilayon nga nabuol kang mga suspetsado ang duag blue nga bag nga may kwarta nga P900, 000.
Pinaagi sa hot pursuit operation kang kapulisan, natigayon nga madakpan ang apat ka mga suspek sa krimen nga ginkilala kanday Alvin Mariano, Gabriel Tubianosa, Charlie Mariano, kag Jafeit Cabrillos, lunsay mga residente kang banwa kang San Remigio kag may isara nga temporaryo nga naga-istar sa banwa kang Sibalom.
Natigayon naman nga marekober kang kapulisan ang balor P779,550 kag nakatalana nga pasakaan kang kaso nga robbery-hold up ang mga suspetsado.
(photo representation only)
