TARGET matud pa sa PhilHealth nga ma-release sa katapusan sa Oktubre ang kapin sa P320 million nga claims sa mga pribadong ospital sa GenSan.
Segun pa ni Nol Valila, labaw sa PhilHealth-Local Health Insurance Office sa GenSan nga kasamtangan nila nga ginahuman ang pagproseso sa mokabat sa 7,200 claims hangtud sa katapusan sa kasamtangang bulan subay sa ilang gikasabutan sa mga pribadong ospital sa syudad.
Dugang ni Valila ang maong kantidad ang kabahin sa P437-million nga claims nga nakumpleto ang pagsumite sa mga dokumento ngadto sa PhilHealth.
Sukad adlawng Martes, gibutyag ni Valila nga nakaproseso na sila go kapin P49 million nga kantidad sa claims ngadto sa mga ospital sa GenSan ug ma-credit na sa ilang accounts ning semana.
Giklaro usab niini nga anaa lang sa P750 million gikan sa P834 million nga gina-claim sa mga ospital ang pending. Gikan sa P750 million, bugtong P437 million ang adunay igong dokumento samtang ang uban nga mokabat sa sobra P300 million, ang denied o gipabalik sa mga ospital aron subling i-refile.
