CEBU -Muabot sa halos P19 milyunes nga balor sa illegal nga drugas ang nasakmit sa Police Regional Office (PRO)-7 sa duha ka adlaw nga operasyon sa simultaneous anti-criminality and law enforcement operation sa Central Visayas.
Naglakip kini sa nasakmit sa Panglao Municipal Police Station nga nagbalor og P13.7 milyunes gikan sa suspek nga si Roel Borja, 25-anyos ug giilang high value individual.
Nakuha sa mga operatiba ang 20 ka dagkong putos sa gituohang shabu nga motimbang ug 2,025 gramos nga dunay standard drug price nga P13,770,000.
Samtang, kapin sa 600 ka tawo usab ang nasikop atol sa duha ka adlaw nga regionwide strategic anti-criminality operations sa kapulisan diin niresulta usab kini sa pagkasakmit sa P4.6 milyunes nga balor sa illegal nga drugas gikan sa Hunyo 20-21, 2023.
Ang mga nasikop naglakip sa 136 ka drug personalities, 193 ka mga sugarol, 248 ka wanted persons ug 20 ka tawo nga naghupot ug armas nga walay lisensya.//
