Mikabat sa dul-an P14 million ang danyos sa tulo ka sunog nga niigo sa barangay Lahug, Ermita og San Antonio dakbayan sa Sugbo niadtong Sabado og kagahapong adlawa.
Dili mominus 23 ka pamilya o 115 ka mga indibidwal ang naapektohan sa sunog.
Sa inisyal nga report gikan sa Cebu City Fire Office, dili moubos sa 8 ka residential properties ang naugdaw sa unang sunog nga nahitabo sa Salinas Drive nga nakaapekto sa walo ka pamilya o 40 ka mga indibidwal ug aduna kini gibana-banang P3.7 million nga danyos.
Matud sa imbestigador sa sunog, ang kayo nagsugod sa balay nga gipanag-iya ni Renato Diaz.
Apan hapit usa ka oras human nila napalong ang sunog sa Barangay Lahug, ang mga bombero sa dakbayan niresponde usab sa laing alarma sa sunog sa Brgy. San Antonio sa Sugbo.
Ang ikaduhang sunog ni-ugdaw sa kinatibuk-ang 15 ka panimamalay ug commercial establishments nga nakaapekto sa 15 ka pamilya o 75 ka indibidwal ug gibana-banang mokabat sa P9.6 million ang danyos.
Nasayrang, nagsugod ang sunog sa San Antonio sa usa ka establisemento nga gipanag-iya ni Vicente Reston.
Samtang sa sunog niadtong Sabado sa Ermita, miabot sa P675,000 ang danyos sa sunog sa edipisyo nga gi-okuparan sa nagkalain-laing mga manindahay.
