Wala na sang pagabayaran nga P10 ang mga motorista, tricycle kag iban pa nga salakyan nga nagaagi sa Brgy. Cogon padulong sa Brgy. Punta Cogon matapos nasolbar na ang problema sa duta.
Ini kasunod sang pagkalasugot sang tag-iya nga si Lolito Cerilos kag ni Kapitan Reynaldo Alparaque.
Sa interview sang Brigada News FM Roxas City kay Kapitan Alparaque, ginpahayag sini nga nagpangayo na sang pasensya si Cerilos sa iya kag sa mga pumuluyo nga iya naperwisyo.
Matandaan nga naghabuyanay pa sang malain nga tinaga sanday Cerilos kag Alparaque bangud sa pagbangga kag pagpanukot sini sa mga nagaagi sa nasamnit nga lugar.
Nahibaluan nga nakalab-ot pa sa korte ang nasambit nga isyu bangud nagpasaka sang kaso si Alparaque batuk kay Cerilos.
Apang iya ginpahayag nga i-atras nalang ang kaso kag magaperma sila ni Cerilos sang agreement sa piscal agud may yara sang Affidavit of Desistance.
Nagpromisa naman si Cerilos nga indi na niya pagliwaton ang pagpanukot kag indi na ini magtuga sang gamo kag magasunod ini sa ila nga ginkasugtan.
Suno kay Alparaque nga magapain ini sang 20% gikan sa ila budget para sa 2024 agud mabayaran ang duta ni Cerilos kag magapangayo man sila sang bulig sa City kag Provincial government.
Sa karon, ginahulat nalang ang pinal nga desisyon ni Cerilos para sa iya duta agud maproseso na ang mga nagakaigo nga dokumento sa pagbakal sini. | Judy Ann Juare
