SUBLING nagapanawagan ang opisyal sa Rajah Buayan Transport Cooperative ngadto sa lokal nga pang gobyerno nga hatagan usab og ayuda ang mga tricycle drivers sa Gensan nga adunay franchise susama sa mga Public Utility Vehicles nga ilawom sa LTFRB nga adunay Pantawid Pasada Card tungod sa sigi nga pagtaas sa presyo sa gasolina.
Sa pahayag ni RBTC Chairperson Larry Villegas, sa miaging tuig nangayo sila og ayuda tungod sa pandemya, ang gihatag bugas, sa karon subli sila nga mangayo og ayuda sama sa ginahatag sa gobuerno sa mga jeepney drivers nga Pantawid Pasada Card nga adunay sulod P7,200 pesos nga kantidad sa gasolina.
Niagi daw sila kaniadto sa komitiba sa transportasyon ug ang tubag dili kaya sa pondo, apan gumikan sa reklamo sa iyang mga sakop nga franchise holder subli siya nga nanawagan sa lokal nga pang gobyerno sa Gensan basin aduna nay pondo.
Samtang ang pangulo sa pula nga cluster sa tricycle nga si Joshue Fernandez sumala niini nga maayo ang mga jeepney kay adunay nagahatag ayuda nga taga LTFRB apan sila nga anaa ilawom sa MTFRB wala na sila nagalaum niini ilabi na siya nga dili daw kampi sa administrasyon kay nagkampanya sa kaatbang sa politika sa milabay nga piniliay.
Gidugang ni Fernandez nga ubay-ubay pa ang ilang mga concern apan wala pa nakabalik ang chairperson sa komitiba sa transportasyon nga si Kagawad Lagare Jr.
Sumala sa iyang staff nga bisan sila wala nasayod kanus-a kini makabalik sa GenSan, samtang nagapaabot usab sila kanus-a mag-convene ang MTFRB Board nga ang chairman mao ang mayor. I Ver Diazon
