BAKUNA gihapon ang pinakaepektibong pangontra batok COVID-19. Kini ang gihingusgan ni Dr. Fidel Peñamante, presidente sa Philippine Medical Association o PMA GenSan dungan sa pag-awhag sa mga wala pa nabakunahan nga magpabakuna labi pa nga mibutho ang Omicron variant.
Gitino usab ni Peñamante nga bisan paspas makatakod ang Omicron variant tungod anaa kini sa upper respiratory tract o sa bronchial area mao nga daling makagawas hinungdan paspas makatakod.
Ang nakaayo lang sa maong variant tungod dili kaayo magrabehan ang matakdan labi na sa mga bakunado.
Sa GenSan subay sa data nga nakita, bisan mitaas ang kaso sa COVID-19 ning panahuna apan anaa sa 47 percent niini ang asymptomatic o walay simtomas sa sakit, 52 percent ang nakasinati og mild symtpoms ug usa ka porsiento ang moderate, hinungdan ubos gihapon ang occupancy rate sa mga ospital.
Sa karon, mas maayo matud pa nga mabakunahan ang wala pa nabakunahan tungod epektibo kining pangontra sa virus ug mahinungdanon usab ang behavorial change ug dili pa kinahanglan ang second booster.
Dugang pa ni Peñamante bisan mahuman na ang pandemic, magpabilin ang virus, mao nga angayang magpabakuna ang tanan. | Joseph Reyes
