MALAY, AKLAN—Nagpromisa it bulig sa LGU Malay do Office of the Presidential Assistant for the Visayas (OPAV) sa pagbukas it isla it Boracay sa mga turista.
Sa ginpatigayon nga pueong kay Malay acting Mayor Frolibar Bautista, ginpasiguro ni Undersecretary Anthony Gerard “Jonji” Gonzales nga una do bulig para sa isla halin sa national government bangud nga do Boracay sigon hay ginakabig nga “tourism jewel” it nasyon.
Ginhalimbawa man kara do Cebu nga unang porobinsya sa Visayas nga ginbuksan it uman do andang borders sa local tourist sa pihak it paeag it COVID-19.
Nagapati man si Usec. Gonzales nga do gin-obra it Cebu hay puwedeng mai-aaply sa Boracay basta nga do Sistema ag proseso it COVID-19 community response hay in place.
Sa pihak nga parte, gin-engganyo man kara do mga local chief executives nga mangin mas “forward looking” ag batunon do kamatuoran nga do komunidad makarun hay kinahangean nga mabuhi kaibahan do COVID agud nga maibalik do pangabuhian it mga tawo. // SHERRY ANNE REUNIR-VIDAL
