ONSEHAN sa iligal nga droga, ang milutaw nga motibo sa pagpamusil-patay sa dalaga sa Barangay Calumpang, GenSan atong Mayo 14.
Matud ni Police Major Robert Fores, hepe sa Calumpang Police Station, nagpahigayon sila og re-investigation sa kaso sa 24-anyos nga si May Ann Tesado.
Sa subling pag-imbestiga, gibutyag ni Fores nga pipila ka oras human gipatay si Tesado gisulod sa uyab niini ang boarding house sa babaye nga gikonsidera sa PNP nga secondary crime scene.
Nasuta usab nga gi-erase ang mga file sa laptop ni Tesado nga alang sa kapulisan dako og tabang kanila.
Nabal-an sa kapulisan sa imbestigasyon nga lambigit si Tesado sa pagbaligya og iligal nga droga online.
Asa wala kini naka-remit sa iyang batal kang alyas Ban-ban nga napatay usab sa operasyon sa kapulisan nakalabay’ng adlaw sa Silway, Barangay Dadiangas West.
Kahibaloan nga sakay sa motorsiklo ang babaye dihang gipusil-patay sa ngitngit nga bahin sa Purok Tomasa, Barangay Calumpang. I Richel Gubalani
