Sambilog ka 19-anyos nga online seller nga babaye ro ginpadaehan segun it mga bastos nga litrato ag mga voice messages it sambilog ka facebook user nga gina-alegar nga sangka pulis.
Natabo ro insidente kasunod sa pag-post it biktima sa anang produkto sa Market Place it Facebook ku Agosto 20.
Base pa sa bikitma nga ginkilaea eamang nga Inday, nangutana sa ana ro sangka Michael Jude Tumarong angut sa ginpost nana nga produkto.
Uwa man ni Inday naisip nga padaehan imaw it mga litrato nana nga nakasuksok eamang it bralet ag cycling shorts nga ginubuoe man sa facebook account it biktima.
Ginkutana ni Inday kung ano ro kinahangean sa ana it eaeaki.
Pero ginsendan eamang imaw it Facebook user it mga bastos nga litrato kaeakip ro maselang parte it facebook user ag link it mga porn sites.
Nagpadaea man segun it voice messages ro eaeaki nga nagangayo it litrato it maselan nga parte ni Inday.
Gintan-aw it biktima ro Facebook account it eaeaki ag nakit-an idto ro mga pictures nga nakasuksok raya it uniform it pulis ag may address nga Bacolod City.
Bangud sa kueba, nagdesisyon raya nga ipa-blotter sa police station ro Facebook user./JIL B. LACSON
