GITUN-AN na karon ang pagpatukod og onion farms sa Soccsksargen region human nakasinati ang nasud og sobrang pagtaas sa presyo sa sibuyas.
Sa gipahigayong Food Security meeting bag-uhay lamang nga gipangunahan sa Department of Agriculture o DA 12 kauban si National Food Security Adviser Emmanuel Piñol, gituki sa mga nahisgutan ang pagmugna og pilot demonstration onion farms sa rehiyon.
Segun ni Piñol nga ang pulang sibuyas nga gibaligya lamang sa kantidad nga P 30 hangtud P 40 per kilo ang moabot sa P 600 hangtud P 800 sa matag kilo.
Tungod niini, ginakonsidera ang Mindanao nga may potensyal nga mahimong production site sa sibuyas.
Target sa maong proyekto nga ma-utilize og 9 ka ektarya nga kayutaan alang sa onion production ning tuiga.
Ang demo farm ang ibutang sa General Santos City ug Bagumbayan, Sultan Kudarat.
Sa first ug second quarter sa 2023, sugdan na ang training kalabutan sa produksyon ug management sa sibuyas pinaagi sa Agricultural Training Institute o ATI region 12.
