Natagpuan ng isang magsasaka ang dalawang rifle grenades habang nagpapastol ng alagang baka sa damuhang lugar na malapit sa kanilang bahay sa Brgy. Tuyon-tuyon, Tuy, Batangas hapon, Pebrero 3, 2023.
Inireport ito sa Tuy Municipal Police Station ng nakakitang magsasaka na si Resty Dimailig, 47 anyos at residente ng naturang lugar.
Batay sa imbestigasyon, nagpapakain ng kanyang baka si Resty at napansin nitong may nakatagong dalawang bakal sa damuhan kung saan malapit ang kanyang alaga.
Agad na rumeponde ang Provincial Explosives and Canine Unit (PECU) para sa proper disposition ng naturang mga granada.
Mabuti na lamang umano at hindi ito naapakan ng naturang magsasaka o ng kanyang alagang hayop.
Iniimbestigahan na kung paano napunta ang naturang mga granada sa lugar.
Nasa pag-iingat na ng PECU ang narekober na mga ekplosibo.
