DAKUNG hulga sa career ni Reymart Gaballo ang pakig-away kay Nonito Donaire Jr. sa umaabot nga Desyembre 11, 2021 sumala sa focal person sa ABAP Gensan Chapter.
Sa paghinabi sa 89.5 Brigada NewsFM Gensan kay Arnel Antiporda sa iyang panglantaw hulga sa career ni Gaballo si Donaire sa rason nga paangat palang kini sa iyang professional boxing career unya si Donaire ang iyang maka-atbang.
Ang mga rason daw niini kay beterano si Donaire ug mahimong mabalda ang career ni Gaballo kon mapildi kay Donaire, kay daghang boksidor nga paangat nga nawala na human napildi sa mga bangiitang boksidor.
Gidugang ni Antiporda nga kon makadaug usab si Gaballo makapasikat pa usab kini kaniya ug molambo ang iyang career sa boksing.
Dugang pa ni Antiporda nga sa dihang nibisita sa Gensan si Donaire unya nitambong sa boxing event sa Gensan nakita niini ang mga boksidor ug usa niini si Gaballo, nakasulti pa daw kini nga may paadtuan ang career sa mao nga mga batan-on ug karon wala damha nga iyaha na nga makaaway sa ring ang usa sa iyang gidayeg nga boksidor sa Boxing at the Park.
Sa bahin ni Antiporda sumala niini nga fan siya ni Donaire apan gumikan nakasubaybay siya sa pagsugod palang ni Gaballo sa Lagao pinaagi sa trainer nga si Boy Gaballo mao nga molabaw ang iyang paghatag suporta kay Gaballo.
Dili usab daw niya malimtan ang kaagi ni Reymart nga niaway batok sa taga Davao del Sur nga natumba kini apan gibalusan ang kalaban ug katulo gipahagba sa luna.
Ang sugyot ni Antiporda kay Gaballo nga maghimo og managlahi nga estratihiya ug dili lang mo tambay sa atubangan ni Donaire, lauman usab daw nga adunay matumba sa duha ka knockout artist. (Ver Diazon)
