Gihingusgan sa Davao City COVID-19 Task Force nga dili kinahanglan mangadlawon og adto sa vaccination sites ang mga indibidwal nga naka-schedule modawat og bakuna nianang adlawa.
Sumala kang COVID-19 Task Force Spokesperson Dr. Michelle Schlosser, hugot gipatuman ang No Walk in Policy sa mga vaccination sites busa mabakunahan ang si kinsa mang vaccinees nga naka-schedule.
Gibarugan usab sa opisyal nga walay pagpasagad sa bahin sa City LGU human nagpunsisok ang mga tawo sa Lt. C. Villafuerte Elementary School vaccination site sa Calinan Martes sa kadlawon.
Gitino niini nga nagpadala dayon og security personnel ug mga pulis aron kontrolon ang kagubot sa mga boot magpabakuna sa maong eskwelahan.
Giawhag usab niini ang publiko nga motabang sa pagbantay batok sa mga wala misunod sa regulasyon nga gitakda sama sa no walk-in policy sa vaccination centers sanglit dili lamang matud pa responsibilidad sa ahensya, lokal nga gobyerno ug pipila ka tawo ang pakigbatok sa virus.
Una niini nag viral ang video nga kuha sa maong eskwelahan human gidugok og bagang doot sa tawo nga nangadlawon aron magpabakuna nga nakasupak sa health protocol.
