KALIBO, AKLAN—Plano nga igapatupad do “No Movement Sunday” sa banwa it Kalibo, Aklan.
Raya hay sambilog sa mga gin-istoryahan sa ginpatigayon nga special session it Sangguniang Bayan Kalibo kahapon.
Suno kay Vice Mayor Cynthia dela Cruz, do nasambit nga rekomendasyon hay iga-presentar pa sa Municipal IATF ag kamana man kay Kalibo Mayor Emerson Lachica agud sa pagpaguwa it sangka executive order angot kara.
Ginpahayag man it taga-Municipal Health Office pinaagi kay Mr. Lorenz Laserna, Nurse ll, mabahoe nga bulig kung owa it movement sa Kalibo bangud nga do virus hay nagausoy malang it makapyutan ngani nga kung owa it tao nga nagaserbeng host hay mautod do ginatawag nga “chain” it transmission.
Samtang, nagpabor man do pilang asosasyon it mga vendors ag stall owners sa Kalibo public market nga makaangkon it bisan sang adlaw nga pahuway agud nga makabulig nga mapanaba do kasi it COVID-19 sa kabisera it Aklan.
Madumduman, nauna eon nga nagpatupad nga “No Movement Sunday” do mga banwa it Banga, Malinao, Tangalan, Ibajay ag Numancia. // SHERRY ANNE REUNIR-VIDAL
