PADAYON ang paggukod sa otoridad sa tawo nga gilambigit sa investment scheme nga Alabel-Maasim Credit Cooperative (Alamcco). Matud ni Atty. Regner Peneza, labaw sa National Bureau of Investigation- Sarangani District Office (NBI-SARDO) gisuta nila ang kahimutangan sa mga personalidad nga gikasuhan.
Kini dungan sa paggula sa warrant of arrest syndicated estafa batok sa mga opisyal sa nasangpit nga kooperatiba sa Sarangani. Dugang ni Peneza, gawas sa mga warrant of arrest dunay mga bag-ong reklamo nga naabot kanila batok sa mga nahisgotan.
Ang maong mga reklamo ang takda na usab nilang ipasaka sa piskalya sa mga umaabot nga adlaw.
Gawas sa syndicated estafa, gipasakaan usab nila ang opisyal sa Alamcco og kasong pagsupak sa Securities Regulation Code. Kini ang gipasaka sa NBI kauban ang Department of Justice’s special task force sa Manila ug sakop sa Securities and Exchange Commission (SEC) sa Manila ug Davao. 2019 gipasakaan og kaso ang 39 ka indibidwal nga gilambigit sa Alamcco ug sa mother firm nga Alabel Maasim Mining Corp. (Almamico) tungod sa ilang sumala pa nga pyramiding investment operations.
Nakalista sa NBI-Sardo ang naa sa 152 complaints batok sa Alamcco ug Almamico, kalabut sa unrecovered investments nga P47.1 milyon. ( Richel Gubalani)
