BICOL—Kaipuhan suboot ubuson na para sa first dose an natatada pang Sputnik V vaccine sa syudad nin Legazpi.
Sigun ki alkalde Noel Rosal, bako siring kan Sinovac asin Astrazeneca na parehas an pigagamit sa first asin second dose, an Sputnik V suboot na gibo kan Gamaleya Institute kan Russia igwa nin separadong klase para sa second dose.
Sa presente, igwa pa nin kulang-kulang unmil na doses nin Sputnik V na natada sa syudad asin ini ipigtama para sa mga nakapagparehistro na sa QR Code.
Abuton na kaya suboot sa 19,000 an mga nakakua nin QR code kaya ipig-schedule na ninda an mga ini bilang prayoridad para sa bakuna.
Sa presente, abuton na suboot sa labi 30,000 an mga nabakunahan sa syudad alagad nasa 10,000 pa sana an nakakumpleto kan second dose.
Ipigbida man ni Rosal an epekto kan Sputnik kun sain dae suboot nin gayong namatean na adverse reaction an mga natudukan kaini base sa testimonya kan nagkapira, bako siring kan ibang bakuna na may pigkalintura.
Mientrastanto, ipinahayag man kan alkalde na dae ninda pighihiro an P200 million na pondong nakatagama kuta sa pagbakal nin COVID-19 vaccine.
Enot kuta na pigtarget kan LGU na magbakal nin Astrazeneca vaccine alagad haloy pa suboot ini maabot kaya iniatras na ninda.
Posible man na itagama na sana ninda an nasabing pondo para sa pagbakal nin booster shot oras na matapos na ang vaccination rollout.###
