LEGAZPI CITY – Kinumpirmar kan Commission on Elections (COMELEC) Bicol na naitao na an honoraria sa nagkapirang mga paratukdo na nagsirbing electoral boards sa Barangay asin Sangguniang Kabataan Election (BSKE) 2023 sa bilog na rehiyon puon pa kan Nobyembre 6-8 sa presenteng taon.
Sa intrevista kan Brigada News FM Legazpi kay COMELEC Bicol Regional Director Atty. Ma. Juana Valeza, sinabi niya na nasa 75% pa sana an nakakaresibe nin honoraria.
Pigkakarkulong nasa 34,000 na mga paratukdo sa rehiyon an babayadan kan COMELEC na nagserbi sa nakalihis pa sanang election.
Abuton man sa PHP5,000-10,000 an makukua ninda alagad ikakaltas digdi an tax.
Sa Legazpi, isinagibo kan COMELEC an payout sa SM City Legazpi nganing magin komportable an mga electoral boards sa pagkuha kan saindang honoraria.
Sa iba pang banwaan asin syudad sa Bicol, hahanapanan man sinda ki venue nganing magin komportable an mga ini sa pagkuha nin honoraria.
