Kinumpirma ni Surigao del Norte Representative Robert Ace Barbers na nakatakdang makipag-alyansa ang Nacionalista Party sa Partido Federal ng Pilipinas ni Pangulong Bongbong Marcos.
Ayon kay Barbers na miyembro ng Nacionalista, plano itong gawin sa pagtatapos ng buwan at sa kasalukuyan ay nasa proseso na ang nilulutong alyansa.
Nakasisiguro rin ang kongresista na mapapabilang sa lineup ng administrasyon sa pagka-senador ang kapatid ng pangulo na si Senadora Imee Marcos.
Kasapi aniya ng NP si Marcos kaya kung makikipag-alyansa ito sa PFP ay tiyak na kasama siya sa slate ng punong ehekutibo.
Samantala, idinagdag pa ni Barbers na posibleng buuin ang listahan ng Senatorial candidates ng partido o alyansa bago ang paghahain ng certificates of candidacy sa Oktubre.
Nais umano ng Nacionalista na ihanay ang partido sa PFP upang ipakita ang suporta sa lahat ng programa ni Pangulong Marcos tungo sa pagbabago at kaunlaran ng bansa.
