Kumpyansa ang Department of Health na maibibigay na ang nakabinbin na health emergency allowance o HEA sa mga hindi pa nababayarang health worker ngayong taon.
Sa pre-SONA briefing ng Bagong Pilipinas program, iniulat ni Health Secretary Ted Herbosa na nabanggit kahapon ni Department of Budget and Management o DBM Secretary Amenah Pangandaman sa Cabinet meeting na posibleng mahanapan na ng budget ang HEA ngayong taon.
Nabatid na nangangailangan ang pamahalaan ng 27.7 billion pesos para pondohan ang HEA ng mga health worker na nagserbisyo noong panahon ng State of Public Health Emergency dulot ng COVID-19 pandemic.
Unang nag commit ang DBM na maibibigay nila ito sa taong 2025 ngunit may posibilidad na maibigay ito ng mas maaga ngayong taon.
