Pababa ng pababa ang edad ng mga Pilipino na nabibiktima ng online sexual abuse sa bansa.
Ayon kay National Bureau of Investigation (NBI) Cybercrime Head Victor Lorenzo, 12 anyos ang pinakabatang nasagip nila sa mga isinagawa nilang raid.
Kamakailan din umano ay nasagip nila ang isang 13 anyos na dalawang beses nang nakipagkita sa isang suspek na nakilala niya online.
Ayon kay Lorenzo, karamihan sa mga nabibiktima ng online sexual abuse ay ang madadalas gumamit ng social media.
Samantala, kung dati aniya ay mga dayuhan ang parokyano ng online child prostitution sa bansa, ngayon pati mga Pilipinong edad 20 pataas ay suspek na rin sa mga ganitong gawain.
Kasabay nito, pinapayuhan ng NBI ang mga magulang na bantayang maige ang kanilang mga anak upang hindi maging biktima ng online sexual abuse at child prostitution.
